অসমে আৰ্থিক বৃদ্ধিৰ হাৰত ৰেকৰ্ড কৰিছে নেকি ! নহলে নোহোৱা- নোপোজা তথ্যৰে অসমবাসীক বিত্তমন্ত্ৰীয়ে কিয় বিভ্ৰান্ত কৰিছে ! যদি বিত্তমন্ত্ৰীয়ে উল্লেখ কৰা তথ্য সচা হয় তেন্তে অসম চৰকাৰে দাবী নকৰে কিয় যে স্বাধীনোত্তৰ দেশৰ অৰ্থনীতিত অসমৰ অৰ্থনীতিৰ বিকাশ সৰ্বাধিক বুলি ! পাৰিবনে এই দাবী কৰিব মুখ্যমন্ত্ৰী আৰু বিত্তমন্ত্ৰীয়ে ? যদি নোৱাৰে বাজেটত উল্লেখিত তথ্য মিছা বুলি আমি দৃঢ়ভাৱে কম ৷
অসম চৰকাৰে কালি অসম বিধানসভাত দাখিল কৰা ২০২৩-২৪ বৰ্ষৰ বাজেটত নিজৰ পাৰদৰ্শিতা দেখুৱাবলৈ গৈ বিত্তমন্ত্ৰীয়ে ঘোষণা কৰিলে যে ২০২৩-২৪ বিত্তীয় বৰ্ষত অসমৰ মুঠ ৰাজ্যিক ঘৰুৱা উৎপাদন ( GSDP) ৫.৫০ লাখ কোটি অতিক্ৰম কৰিব ৷ বিত্তমন্ত্ৰীয়ে এই কথাও কলে যে ২০২১-২২ বৰ্ষত অসমৰ GSDP ৰ পৰিমাণ আছিল ৩.৯৩ লাখ কোটি ৷ বাজেটত কিন্তু ২০২২-২৩ বৰ্ষত হোৱা আৰ্থিক বিকাশৰ হাৰ উল্লেখ নকৰিলে ৷ গতিকে এতিয়া যদি আমি বিত্তমন্ত্ৰীৰ তথ্য অনুসৰি চাও তেন্তে দেখিম যে ২০২১-২২ বৰ্ষৰ পৰা ২০২৩-২৪ বৰ্ষলৈকে অসমৰ আৰ্থিক বিকাশৰ হাৰ বছৰি ৪০ শতাংশ ৷ কিন্তু এয়া জানো সম্ভৱ ৷ যিখন চৰকাৰে ঋণ নোহোৱাকৈ কাম এটা কৰিব পৰা নাই অথবা সাধাৰণ ৰাইজৰ ক্ৰয় ক্ষমতা বঢ়া নাই সেইখন ৰাজ্যৰ আৰ্থিক বিকাশ ৪০ শতাংশ হব পাৰে বুলি কোনেনো বিশ্বাস কৰিব ৷ যত দেশৰ আৰ্থিক বিকাশৰ হাৰ ২০২১-২২ বৰ্ষত ৯.১ শতাংশ আৰু ২০২২-২৩ বৰ্ষৰ অক্টোবৰ-ডিচেম্বৰ মাহৰ ত্ৰৈমাসিক বৃদ্ধিৰ হাৰ আছিল মাত্ৰ ৪.৪ শতাংশ ৷ দেশৰ স্বাধীনতাৰ পৰৱৰ্তীকালত দেশৰ কোনো ৰাজ্যৰে এইধৰণৰ আৰ্থিক বিকাশ হোৱা নাই ৷
তাৰোপৰি ২০১৬ চনত বিত্তমন্ত্ৰী হৈ থাকোতে এতিয়াৰ মুখ্যমন্ত্ৰী ডাঙৰীয়াই বিধানসভাত সদম্ভে ঘোষণা কৰিছিল যে এতিয়াৰ পৰা বাজেট দাখিলৰ পূৰ্বে চলিত বছৰৰ বাজেট ৰূপায়ণ সম্পৰ্কে এখন শ্বেতপত্ৰ দাখিল কৰা হব ৷ এইবাৰো তেনেকুৱা কোনো শ্বেতপত্ৰ দাখিল নকৰিলে ৷ আনহাতে বাজেট দাখিলৰ আগদিনা দিবলগীয়া অৰ্থনৈতিক সমীক্ষাৰ প্ৰতিবেদনো দাখিল কৰা ন’হল ৷
গতিকে সকলো কথাই মাত্ৰ চমক সৃষ্টিৰ বাবে কোৱাটো কিমান সমীচীন এবাৰ মুখ্যমন্ত্ৰী ডাঙৰীয়া আৰু বিত্তমন্ত্ৰীয়ে ভাৱক !
(দিলীপ কুমাৰ শৰ্মা)
