♦ শিৱসাগৰৰ বন্দনা কৌশিক বৰদলৈৰ ‘পাহি টেক্সাটাইল’
প্ৰিয় কবি জ্ঞানপীঠ বঁটা বিজয়ী নীলমণি ফুকনলৈ শ্ৰদ্ধা জনাই প্ৰিণ্ট কৰি উলিয়াইছোঁ ‘সূৰ্য হেনো নামি আহে এটা নদীয়েদি’৷ লগতে প্ৰিণ্ট কৰি উলিয়াইছোঁ অতনু ভট্টাচাৰ্যৰ কবিতাৰ মোৰ প্ৰিয় শাৰী ‘প্ৰাপ্তিয়েই জীৱনৰ শেষ কথা নহয়৷’ টি ছাৰ্টত এনেদৰে জনপ্ৰিয় কবিৰ কবিতা প্ৰিণ্ট কৰাৰ বাবেই ‘পাহি টেক্সাটাইল’ৰ টি ছাৰ্টৰ জনপ্ৰিয়তা বৃদ্ধি হৈছে৷ শিৱসাগৰৰ পাহি টেক্সটাইলৰ বন্দনা কৌশিক বৰদলৈয়ে আমাক তেওঁৰ প্ৰতিষ্ঠানৰ বিষয়ে বৰ্ণনা কৰিবলৈ গৈ এনেদৰে কয়৷ বৰদলৈয়ে কয়- আমাৰ প্ৰতিষ্ঠানত এনেদৰে টি ছাৰ্টত কবিতাৰ পংক্তি আদি প্ৰিণ্ট কৰি দিয়াৰ ব্যৱস্থা আছে বাবেই বহুতেই তেনে সুবিধা গ্ৰহণ কৰিছে৷
উল্লেখ্য যে শিৱসাগৰৰ আমোলাপট্টিত বন্দনা কৌশিক বৰদলৈয়ে ২০২০ চনত চাৰিখন শালেৰে ‘পাহি টেক্সটাইল’ নামৰ কাপোৰৰ প্ৰতিষ্ঠানটো স্থাপন কৰিছিল৷ এক লাখ ৮০ হাজাৰ টকাৰে প্ৰতিষ্ঠানটো স্থাপনত তেওঁক ইভা গোস্বামী, মায়াশ্ৰী বৰদলৈ আদিয়ে সহায় কৰিছিল৷ কিন্তু অতি কম সময়ৰ ভিতৰতে কেইবাখনো তাঁত শালৰে প্ৰতিষ্ঠানটোৱে জনপ্ৰিয়তা লাভ কৰিছে৷ বৰদলৈয়ে কয় যে আমাৰ ফেক্টৰীত টছ, মুগা, এৰী, পাট আদি কাপোৰ উৎপাদন কৰা হয়৷
কাপোৰত নতুন নতুন চানেকীৰ ব্যৱস্থা কৰাত সকলো শ্ৰেণীৰ গ্ৰাহকক আকৰ্ষণ কৰিছে৷ অতি কম সময়ৰ ভিতৰত নতুন নতুন চানেকীৰ কাপোৰৰ বিক্ৰী বৃদ্ধি হোৱাত আমি আত্মসহায়ক গোটৰো সহায় ল’বলগীয়া হৈছে৷ বৰদলৈয়ে কয় যে এটা পোন্ধৰজনীয়া আত্মসহায়ক গোটৰ লগত বুজাবুজি কৰি কাপোৰ উৎপাদনৰ বাবে তেওঁলোকৰ সূতা দিওঁ, কাপোৰৰ চানেকী দিওঁ৷ আনকি আত্মসহায়ক গোটৰ মহিলাক মজুৰিও দিওঁ৷ আত্মসহায়ক গোটৰ জৰিয়তে উৎপাদন কৰা কাপোৰ বিক্ৰী কৰিও আমি উপাৰ্জন বৃদ্ধি কৰিবলৈ সক্ষম হৈছোঁ৷ বৰদলৈয়ে কয় ‘লকডাউনৰ সময়ত প্ৰত্যাহ্বানৰ সন্মুখীন হৈছিলোঁ৷
প্ৰত্যাহ্বান এতিয়াও আছে৷ কিন্তু আমি ইতিবাচক মানসিকতাৰে কাম কৰি থকাৰ বাবেই কাপোৰৰ ব্যৱসায়ত সফল হৈছোঁ৷’ কেনেদৰে সফল হৈছোঁ বুলি প্ৰশ্ন কৰাত বৰদলৈয়ে কয়- ‘আত্মসহায়ক মহিলাৰ মজুৰি, পাহি টেক্সটাইলৰ কৰ্মী আদিৰ বাবে মাহে ৬০ হাজাৰ টকা খৰচ হয়৷ বুজন পৰিমাণৰ ধন মাহে খৰচ কৰিও আমি চলি আছোঁ৷ ব্যৱসায়ত এনেদৰে চলিব পৰাটোৱেই অন্যতম সফলতা বুলি ভাবিছোঁ৷’ বন্দনা কৌশিক বৰদলৈয়ে কয় যে কম সময়ৰ ভিতৰতে বিভিন্ন চানেকীৰ কাপোৰ শালৰপৰা কাটি বিক্ৰী কৰি অভিভূত হৈছোঁ৷ দৈনিক নতুন বিভিন্ন চানেকীৰ কাপোৰৰ লগতে গামোচা ডিজাইনৰ মেখেলা চাদৰৰ জোৰা বিচাৰি বহুত গ্ৰাহক প্ৰতিষ্ঠানলৈ আহে৷ গ্ৰাহকে আদৰি লোৱাত আমি দুবছৰৰ ভিতৰতেই আত্মনিৰ্ভৰশীল হোৱাৰ পৰিৱেশ সৃষ্টি হৈছে৷ বন্দনা কৌশিক বৰদলৈয়ে কয়- ‘কিছুমান বণিক গোষ্ঠীয়ে থলুৱা শিপিনীৰ দ্বাৰা উৎপাদিত সামগ্ৰীসমূহৰ বজাৰ নষ্ট কৰি, কোচ বিহাৰ, বিহাৰ, ছুৰাট, বেনাৰসৰ সামগ্ৰীৰ বজাৰ ভৰাই তুলিছে৷ বহুত কষ্টকৰ এই যুঁজ৷ মানুহৰ মাজত এটা ধাৰণা প্ৰতিষ্ঠা কৰি আমি বাহিৰৰ কাপোৰক প্ৰত্যাহ্বান জনোৱাটো কিছু সহজ নহয়, থলুৱা শিপিনীকো আগবঢ়াই নিবলৈ কৰা যুঁজ অব্যাহত থাকিব৷
ফোন- ৯৮৬৪০৩৭৪১৬
